The ability to work through the medium of Welsh is essential to this role.
Mae'r swydd hon ar agor i weithwyr Prifysgol Caerdydd yn unig ar hyn o bryd. Peidiwch ymgeisio os nad oes ganddoch gytundeb cyflogaeth ddilys gyda’r brifysgol.
Ymgeiswyr Mewnol yn Unig – Tiwtor Cymraeg Sectorai Diwylliant a Chrefydd
Mae Dysgu Cymraeg Caerdydd yn chwilio am diwtor brwdfrydig i ymuno a thîm sydd yn darparu rhaglen ddysgu o'r safon uchaf. Bydd disgwyl i ddeiliad y swydd fod yn gyfrifol am ddarparu cyrsiau a chefnogaeth i weithlu a gwirfoddolwyr yn y sectorau diwylliant a chrefydd, trwy gynllun Cymraeg Gwaith. Pwrpas y rôl yw i gynllunio a dysgu amserlen ar gyfer staff a gwirfoddolwyr er mwyn eu bod yn gallu defnyddio y Gymraeg yn y gweithle
Rydym yn chwilio am berson egnïol er mwyn sefydlu a chynnal darpariaeth ar gyfer staff yn y sectorau hynny. Hoffwn weld y tiwtor yn cyfrannu at weithgareddau dysgu atodol Dysgu Cymraeg Caerdydd gan gynnwys y Sadyrnau Siarad.
Bydd gofyn ysbrydoli dysgwyr a’u hannog i ddatblygu eu sgiliau ieithyddol er mwyn symud tuag at ruglder. Byddwn hefyd yn disgwyl gweld sefydlu sesiynau cymdeithasol i staff sy’n dysgu Cymraeg i roi cyfle iddynt ymarfer sgwrsio.
Mae Dysgu Cymraeg Caerdydd yn darparu cyrsiau Cymraeg i Oedolion ar bob lefel ar ac yn cynnig ystod o gyrsiau gwahanol, gan gynnwys cyrsiau wythnosol, dwys, bloc a phreswyl, gweithle a chyrsiau e-ddysgu. Bydd deiliad y swydd yn dysgu ar bob lefel, o gyn-fynediad i hyfedredd ac yn dysgu staff BBC Cymru, Canolfan Mileniwm Cymru, a Athrofa Padarn Sant yn bennaf, gyda’r hyblygrwydd i gynnig gwersi i unrhyw weithle arall o fewn y sectorau.
Cyflog: £33,951 - £36,636 y flwyddyn (Gradd 5)
Mae'r swydd yma yn llawn amser am gyfnod penodol o flwyddyn. Rydym yn croesawu ceisiadau a syniadau hyblyg o ran gweithredu, ac yn gallu cynnig hwn fel secondiad i'n staff presennol os ydynt yn dymuno. Os ydych am drafod y swydd mewn rhagor o fanylder, mae croeso ichi gysylltu gydag Anna Jones.
Dyddiad cau: Dydd Mawrth, 14 Gorffennaf 2026
Nid yw ceisiadau allanol yn cael eu hystyried ar gyfer y swydd hon ar hyn o bryd. Os penderfynir agor y swydd i ymgeiswyr allanol, bydd yr isbennawd ar y brig yn cael ei thynnu a rhoddir digon o amser i chi wneud cais - cadwch olwg ar y dudalen am fanylion.
Mae Prifysgol Caerdydd wedi ymrwymo i gefnogi a hyrwyddo cydraddoldeb ac amrywiaeth a chreu gweithle cynhwysol. Rydym o’r farn bod modd gwneud hyn drwy ddenu, datblygu a chadw ystod amrywiol o bobl o lawer o gefndiroedd gwahanol. Felly, rydym yn croesawu ceisiadau gan bobl o bob rhan o’r gymuned, beth bynnag fo’u rhyw, eu hethnigrwydd, eu hanabledd, eu cyfeiriadedd rhywiol, eu hunaniaeth draws, statws eu perthynas, eu crefydd neu eu cred, eu cyfrifoldebau gofalu neu eu hoedran. Rydym yn croesawu ac yn annog ceisiadau yn arbennig gan y rhai o grwpiau nad ydynt wedi’u cynrychioli’n ddigonol o fewn gweithlu'r Brifysgol, fel y rhai sy'n uniaethu fel LGBT+, o gefndiroedd ethnig leiafrifol neu'r rhai ag anableddau. Er mwyn helpu ein cyflogeion i sicrhau cydbwysedd rhwng eu gwaith a’u bywydau personol, byddwn hefyd yn ystyried cynigion i weithio’n hyblyg neu rannu swydd.
Caniateir i geisiadau gael eu cyflwyno yn Gymraeg, ac ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.